Trök nao de hoespagina
Trök nao instruminte

De love-site vaan ’t gebäöre: de trompöttte-sectie



Al kriege zie ze soms wel ‘ns gepiezelt, tot ‘t té fien en neet hel genóg is, veural tijdens de befaomde rippetisies, ‘t maag gezag weure -in alle besjeijenheid want dat pas hun-, dit is e sjerrep sectieke.

Mèt väöl belump en bezej zien dit, al wèlt NOG neet ederien dat óndersjrieve, de aojers, ’t blood (al keump ’t vaan ónder de negel), de zuurstof en de kneuk, boe de bendsjes en bendinnekes ’t gans sezoen op tere, jao ze slaove wie ’n moor.
Mèt de nudige spitsvondigheid, ’t zjuste geveul veur ’t momint en insjattend wat de res nog d’r oet gepeers kreig, keump vaanoet diz fiengeveulige sectie, ónder de bezielende leiding vaan euze commandäör Jan, eders kier weer obbenuijts e gepas melodielijnsje oet die manjefieke kelleke.
Mestreech sjöddelt (jao ’t is al ieder besjreve) op en neer, es die bom bars.

Es bijj hun collega’s zoe noe en daan get benkelikke mominte optrèjje en ’t effekes neet mie geit, vaange zie dat, zónder ein koej noot, op door ouch hun partijke euver te neume.
Wie me zeet, d’n eine speulmaan is d’n aandere wel ’n deunsje weerd. Sjariteit steit bijj hun daan ouch veurop zoetot v’r daan ouch ins gerös mage oetspreke: bedaank, bedaank, jao ‘nne GROETE MERCI.

Dreij daog, Karneval in Mestreech, en de nudige weke daoraon veuraofgaond, drage zie de hermenie door de sjoenste tied vaan ’t jaor.

Zie zien löstig, en pakke uuch vas, geve Zjeng mèt z’nne moneka ouch ’n plaots en wete daoneve zeker boe de brouwer is. De straotkarneval dee geit neet nao de pieringe, zoe lang zie, op krachte gehawwe door reube, friet en beer, vaan ’t zwumbad, tot de Maosboelvaar es echte straoteluipers rope NOG EINT.
Mèt de dikke zjiem veurop, mèt in ’t spoor ’t nissjeke, noonk Harie, miene (diene of häöre) maan, Maria en al de meidskes vaan Mestreech, bars de bom en geit ’t noe gebäöre. Al bleif bijj tant Ketrien de kattebak stoon, umtot Lerang, d’n drekmaan, weer staak, laope zie mèt blaore aon hun veuj, ’t masjorètsje aon hun zijj, in ‘nne awwe loomel bekans dreijj daog verlore.

Laot meh goon, dat is de sajs,

Leef trompötterkes en trompötterinnekes, geer leef meh eine kier dus bloos mer tot g’r greun zuut!

 

Wee zien veer oonder aandere? Jan, Chantalle, Danny, Frank, Frenk, George, Harry, Hugo, Joost, Leanne, Paul, Pol, Stephan, Tim, Yvonne en Twan.