vastelaovend 2008

Trök nao de   hoespagina

Maag iech de “bende “ eve veurstèlle:

De Sous Bras Band Tête de Veau opgeriech um haaf drei is ‘n federatie vaan oonaofhenkeleke meziekgezèlsjappe en kompeneie groet vaan 1 tot 15 maan eder.

Veer kinne “Sjrouf Los”, ’t Hasseltcomitee, De Prinsegarde, Duo Hoort wie klopt daar, ’t Witte Sjaop, ’t Zwarte Sjaop, De Zate Knien, De Piep Leeg, De Hinne, De Valse Kringk, De Groffiäötsjes, de Oonaofhenkeleke, de Stèk, en daan bin iech al ze leve nog wel de ein of de aander kompenei vergete. Same zoe’n klein 100 speulende leie, 40 manslui en vrouwlui helle kern, de res veural bij vastelaovend. Veer reize door gans Europa, speule in Poix de Picardie, evegood es Nantes, bezeuke Dortmund en Visé, meh sloon zeker neet de Profronde Almelo euver, ein vaan eus miest gerinnomeerde optrejjes. Veer goon ouch regelmaoteg op retraite, örges in de bosse, met väöl zand en graas veur de kinder en veur de awwers weurd ouch good gezörg,…..!!

 Veer kinne gein bestuur meh höbbe wel ’n W.C. De W.C. deit wat ‘n W.C. moot doen.

Boete ’t sezoen mote d’r al hiel gooj  reie zien wèlle veer optrejje. Vaanaof d’n ierste zoondag nao de 11e vaan de11e tot aon de Vastelaovend rippetere veer bei us rippetitielokaal, Kaffee FM oppe Mèrret. ’t Rippertoire besteit oet 137 internationaole nómmers boevaan d’r 16 altied gespäold weure. En es veer speule daan ’t leefs op de straot. tösse de lui, langs de kaffeekes, op e pleinsje, daan zier veer in us illemint.

 Befaomp en beruch is us nuijaorskonzèr, us mazjèstueus en volumineus klaankbeeld

( oerdöpkes zien wel hendeg es veer in de buurt zien ), de deilnaome aon de Keizerparaad in Wiek ( veer hawwe neet zoe vaan regelkes ) en ’t jaorleks konzèr vaan Chopin z’ne Doejemarsj op d’n dinsdagnach vaan de Vriethof nao Slevrouw.

  Aon de geng ! 

De kretser

 

 
Veurstèlle